༄༅།། ཀན་སུའུ་ཀྲུང་དབྱི་སློབ་ཆེན་བོད་ལུགས་གསོ་རིག་སློབ་གླིང་གི་སྐབས་བཞི་བའི་གསེར་གྱི་ལྡེ་མིག་ཅེས་པའི་

ཤེས་བྱའི་འགྲན་སྡུར།

    ཤེས་བྱའི་ཟེགས་མ་རྡུལ་དུ་བརྩེགས་པར་བློ་རིག་གི་མེ་སྟག་མཆེད་པའི་སློབ་བུ་ཚོའི་ཤེས་འདོད་ཀྱི་སྐོམ་སྲེད་ཇེ་ཆེར་དང་། རྟོགས་མོས་ཀྱི་རྣམ་དཔྱོད་ཇེ་ཡངས་སུ་གཏོང་ཆེད་དུ་༢༠༡༩ལོའི་སྤྱི་ཟླ་༡༡པའི་ཚེས་༡༦ཉིན། རང་སློབ་གྲྭའི་སྣ་འཛོམས་ཐོག་ཁང་དུ་ཀན་སུའུ་ཀྲུང་དབྱི་སློབ་ཆེན་བོད་ལུགས་གསོ་རིག་སློབ་གླིང་གི་སྐབས་བཞི་བའི་༼གསེར་གྱི་ལྡེ་མིག༽ཅེས་པའི་ཤེས་བྱའི་འགྲན་སྡུར་སྤེལ།

འགྲན་སྡུར་འགོ་མ་བརྩམས་པའི་སྔོན་དུ་ཚོགས་ཞུགས་དགེ་སློབ་ཡོངས་ཀྱིས་གསོ་བ་རིག་པའི་བསྟན་པ་ཡར་ངོའི་ཟླ་ལྟར་འཕེལ་རྒྱས་འགྲོ་ཆེད་གསོ་རིག་བསྟན་པ་རྒྱས་པའི་སྨོན་ལམ་ཚར་གཅིག་ཚོགས་འདོན་བྱས།

འགྲན་སྡུར་གྱི་གོ་རིམ་ལ་ངེས་འདེབས་འདྲི་གཞི་དང་། སྐོར་འདེབས་འདྲི་གཞི། སྨན་སྣ་ངོས་འཛིན། དཀའ་གནད་འདྲི་གཞི་བཅས་རྣམ་པ་བཞི་རུ་བགར་ཡོད་པ་དང་། འདྲི་གཞིའི་ནང་དོན་ལ་བོད་སྨན་རྨང་གཞིའི་སྐོར་དང་། ནད་ཐོག་གི་སྐོར། སྨན་རྫས་ཀྱི་སྐོར། གསོ་རིག་ལོ་རྒྱུས་ཀྱི་སྐོར་བཅས་དྲི་གཞིའི་ཁྱབ་ཁོངས་རྒྱ་ཆེ་ལ་གཏིང་ཟབ་ཅིང་།  འགྲན་ཞུགས་ཚོགས་མིར་ཡང་སྤོབས་པ་ཆེ་ཞིང་སྨྲ་ལྕེ་དག་ལ། བློ་རིག་རྒོད་ཅིང་རྣམ་དཔྱོད་ལེགས་པས་དྲིས་ལན་ཡང་དག་འདེབས་ཐུབ་པ་མ་ཟད། སྨན་སྣ་ངོས་འཛིན་ལས་དབྱར་ཁ་དང་སྟོན་ཁའི་སྨན་སྣ་ངོ་སྟོན་གྱི་གྲུབ་འབྲས་ཀྱང་མངོན་གསལ་དོད་པོ་འདུག དཀའ་གནད་དྲི་གཞི་ནི་གཉེན་ཁའི་དྲི་གཞི་ཞིག་ཀྱང་རེད་དེ་ལན་ཐོབ་ན་དགའ་བའི་འཛུམ་ཆུང་གྱི་ལེར་དང་། ལན་མ་ཐོབ་ན་ཕངས་སེམས་གྱི་མགོ་བོ་དུད་དུ་འཇུག་ནུས།

སླར་བོད་ཀྱི་གསོ་བ་རིག་པ་ཡར་ངོའི་ཟླ་ལྟར་འཕེལ་རྒྱས་འགྲོ་བའི་སྨོན་འདུན་དང་ཆབ་ཅིག  ༢༠༡༦ལོའི་བོད་སྨན་དངོས་གཞི་འཛིན་གྲྭས་དཀའ་མོའི་ཚེགས་དང་དཀོན་མོའི་རྒྱུ་ལ་མ་འཛེམ་པར་ཐེངས་འདིའི་འགྲན་སྡུར་གྱི་འགོ་བཀྲ་ཤིས་ཤིང་མཇུག་ཕུན་སུམ་ཚོགས་པ་ཞིག་བསྡུས་པར་ལག་ཟུང་ཐལ་མོ་སྦྱར་ཏེ་བཀའ་དྲིན་ཞུ་ཞུ།